Wednesday, 20 September 2017

အမဲနှစ်လုံးပြုပ်



ဟင်းချက်ဖို့ စဉ်းစားလို့ မရတဲ့ရက်တွေမှာ ဈေးမှာပါတ်ချာလည်နေရင်း ကြံရာမရတဲ့အဆုံး တွေ့တာတွေ ခြင်းထဲကောက်ထည့်လာရတာမျိုးလဲ ဖြစ်တတ်ပါတယ်။

ဒီနေ့တော့ အမြဲတမ်းတော့ မစားဖြစ်ပေမဲ့ တခါတလေ စားဖြစ်တဲ့ အမဲနှစ်လုံးလေးတွေ ဝယ်လာကာ ကြက်သွန်ဖြူ စပါးလင် ချင်းတို့နဲ့ ပြုပ်ကာ အချဉ်ရည်လေးစပ်ပြီး စားဖြစ်တဲ့အတွက် ပြုပ်နည်းလေး မျှဝေလိုက်ပါတယ်။

ပါဝင်ပစ္စည်းများ
  • အမဲနှစ်လုံး  - ၂ခု
  • ဆား - လက်ဖက်ရည်ဇွန်း တဝက်သာသာ
  • ဟင်းချိုမှုန့် - လက်ဖက်ရည်ဇွန်း တဝက်
  • နနွင်းမှုန့် - လက်ဖက်ရည်ဇွန်း လေးပုံတပုံ
  • ချင်းခပ်ပါးပါး - လေးပြား
  • စပါးလင် -၂ပင်
  • ကြက်သွန်ဖြူ အလုံးလိုက် - ၂ဥ
အချဉ်ရည်စပ်ရန်
  • ငါးငံပြာရည် - ထမင်းစားဇွန်း ၃ဇွန်း 
  • အချိုမှုန့် - လက်ဖက်ရည်ဇွန်း တဇွန်း
  • သကြား - ထမင်းစားဇွန်း တဇွန်း
  • ငရုတ်သီး အလှော်မှုန့် - စားနိူင်သလောက်
  • သံပုရာရည် - စားနိူင်သလောက်
  • အားလုံးကို ဇလုံတခုထဲထည့်ပြီး သမအောင် ရောမွှေထားပါ

ပြင်ဆင်ပုံ
  1. အမဲနှစ်လုံးကို ရေဆေးပြီး ထက်ခြမ်းခြမ်းကာ ဆား ဟင်းချိုမှုန့် နနွင်းမှုန်တို့နှင့်နယ်ပြီး ၁၀မိနစ်လောက်ထားပါ
  2. စပါးလင်ကို အပင်လိုက်ရေဆေးပြီး အထုံးထုံးကာ မညက်တညက် ထုထားပါ
  3. ချင်းကိုရေဆေးပြီး ခပ်ပါးပါး လှီးထားပါ
  4. ကြက်သွန်ဖြူ အလုံးလိုက်ကို အပြင်ခွံ နဲနဲချွတ်ကာ ရေဆေးထားပါ
  5. အမဲနှစ်လုံး အရသာဝင်လောက်တာနဲ့ ကြက်သွန်ဖြူ အလုံးလိုက် ထုထားသော စပါးလင် ချင်းပြားနှင့် ရေ အနည်းငယ်ထည့်ကာ ပြုပ်ပေးပါ
  6. အိုးမကပ်စေရန် သတိထားတည်ပေးပါ
  7. အရင်ဆုံး ထည့်ထားသော လုံးရည်ခမ်းတာနဲ့ ရေမြုပ်အောင်ထည့်ပြီး အသားနူးတဲ့ထိ ပြုပ်ပေးပါ
  8. အသားနူးလာပြီး ရေမခမ်းခင်လေးမှာ အရသာမြည်းပြီး လိုသလို ပြင်ပေးကာ မီးပိတ်ပေးပါ
  9. ရေခမ်းလျှင် အိုးကပ်သွားနိူင်တဲ့အတွက် ရေမခမ်းခင် မီးပိတ်ပေးပါ
  10. ပြီးတာနဲ့ ခပ်ပါးပါးလေးတွေ လှီးပေးကာ မိမိနှစ်သက်သော ကြက်သွန်ဖြူ ကြက်သွန်နီ အချဉ်ရည်တို့နှင့် တွဲဖက်ပြီး သုံးဆောင်နိူင်ပါပြီ။

Tuesday, 19 September 2017

ဝက်နံရိုးကြော်










ဒီတခါတော့ နေ့လည်နေ့ခင်း သားအမိတစ်တွေ စကားပြောရင်း စားဖို့အတွက် ဝက်နံရိုးလေးကြော်လေး ကြော်စားဖြစ်ပါတယ် စားလို့ကောင်းပြီး ကြော်ရတာ လွယ်ကူတဲ့အတွက် ကြော်နည်းလေး မျှဝေလိုက်ပါတယ်။

ပါဝင်ပစ္စည်းများ

  • အသားထူသော ဝက်နံရိုး  -  500g
  • တန်ပူရာမှုန့် - ထမင်းပေါင်းအိုး ဆန်ချင်ခွက် ၂ခွက်
  • ရေ - ထမင်းပေါင်းအိုး ဆန်ချင်ခွက် တ၀က်သာသာ
  • ချင်းအရည် - ထမင်းစားဇွန်း တဇွန်း
  • ဆား - လက်ဖက်ရည်ဇွန်း တ၀က်
  • အချိုမှုန့် - လက်ဖက်ရည်ဇွန်း တ၀က် 
  • နနွင်းမှုန့် - လက်ဖက်ရည်ဇွန်း သုံးပုံတပုံ
  • ဆီ - လက်ဖက်ရည်အကြမ်းပန်းကန် ၅လုံးသာသာ
ကြော်ဖို့ပြင်ရန်
  • တန်ပူရာမှုန့် နနွင်းမှုန့် ချင်းရည် ဆား အချိုမှုန့်တို့ကိုရေနဲ့ရောပြီး သမအောင်မွှေပေးကာ ခပ်ပျစ်ပျစ်ဖျော်ပေးပါ
  • မုန့်နှစ် ခပ်ပျစ်ပျစ် ဖြစ်နေစေရန် ရေကို နည်းနည်းခြင်း ထည့်ဖျော်ပေးပါ
  • မုန့်နှစ်အရမ်းမပျစ် အရမ်းမကျဲစေရန်အတွက် ရေကိုချင့်ချိန်ထဲ့ပြီး လိုတိုးပိုးလျှော့ လုပ်ပေးပါ
  • ဝက်နံရိုးကို ရေဆေးကာ ရေစစ်ထားပြီး ပုံပါအတိုင်း တလက်မသာသာ အနေတော်တုံးပေးထားပါ
  • အရသာ စပ်ထားသော မုန့်နှစ်ထဲမှာ ဝက်နံရိုးကို နှစ်ပေးပါ
  • ဆီကို မီးအပူပေးပြီး ဆီပူပြီး ကျက်လာပါက ဝက်နံရိုးမုန့်နှစ်လူးကိုတတုံးခြင်း ထဲ့ကြော်ပေးပါ
  • မီးအရမ်း မများစေရန် သတိပြုပြီး ကြော်ပေးပါ 
  • မီးအရမ်းများပါက ဝက်နံရိုးမှာ ကပ်နေသော အသားများ မကျက်ဘဲ ဖြစ်နေတတ်ပါတယ်
  • ဝက်နံရိုးကြော် တစ်ဖက်ရွှေဝါရောင်သန်းလာပါက တဖက်ကိုလှန်ပေးပါ
  • နှစ်ဖက်လုံး ရွှေဝါရောင်သန်းလာပါက ဆယ်ပြီးဆီစစ်ပေးပါ
  • ဆီစစ်သွားပါက ဝက်နံရိုးကြော် ကြွတ်ကြွတ် ချိုချိုလေးကို နှစ်သက်ရာ အချဉ်နဲ့တွဲဖက်ပြီး စားလို့ရပါပြီ။

Monday, 18 September 2017

ဝက်ခေါက်ကြော် ကြွတ်ကြွတ်လေး








ဝက်ခေါက်ကြော် စားချင်လို့ တခါတလေလေး ကြော်ပါတယ် ဇကောတချပ်နဲ့ကာလိုက် ပြေးလိုက်ရတာ အမောပါဘဲ ဆီကပေါက်လိုက် ဇကောနဲ့ကာလိုက် ဆီစဉ်မှာဆိုးလို့ ပြေးလိုက် ကြော်ပြီးပန်တော့ ဆေးလိုက်ရတဲ့ မီးဖိုနဲ့ ကြမ်းပြင်တခုလုံး နာရီနဲ့ချီပြီး ဆေးလိုက်ရပေမဲ့ အချိန်တန်တော့လဲ ဝက်ခေါက်ကြော်လေးတော့ ဖြစ်လာတာပါဘဲ။

ပါဝင်ပစ္စည်းများ
  • ဝက်ခေါက် - 1kg
  • ဆား - လက်ဖက်ရည်ဇွန်း တဇွန်း
  • အချိုမှုန့် - လက်ထက်ရည်ဇွန်း တဇွန်း
  • သစ်ဂျပိုးခေါက် - တလက်မခန့် 
  • နာနတ်ပွင့် -၃ ပွင့်
  • ကရဝေးရွက် - ၅ရွက်
  • ဖာလာ - ၃စေ့
  • ဆီ - ၀က်သားမြုပ်လုနီးပါးထည့်ရန်
ပြင်ဆင်ပုံ
  • ဇောက်နက်သော အိုးတလုံးထဲမှာ ၀က်ခေါက်မြုပ်နိူင်ရုံ ရေတ၀က်သာသာထည့်ပြီး ပွက်ပွက်ဆူအောင် တည်ပေးပါ
  • ရေပွက်ပွက်ဆူတာနဲ့ ၀က်ခေါက် ဆား နာနတ်ပွင့်နှင့် သစ်ဂျပိုးခေါက်ကို ထည့်ပေးပါ
  • အိုးအဖုံးကို အပြည့်မအုပ်ဘဲ မိနစ်၃၀ခန့် ပြုပ်ပေးပါ
  • ၀က်ခေါက်ပြုပ်ထားစဉ် ထွက်လာသော အမြှုပ်များကို ခပ်ပြီးသွန်ပေးပါ 
  • အခေါက်ပျော့လာပါက ရေထဲမှဆယ်ပြီး အခေါက်ကို နေရာအနှံ့ ခက်ရင်းဖြင့် လိုက်ထိုးပေးပါ
  • ၀က်ခေါက်မှ ထွက်လာသော အရည်များကို စစ်ပေးပြီး ခြောက်သွားအောင် ၃ နာရီခန့် လေသလပ် ခံပေးထားပါ
  • လေသလပ်ခံထားသော ဝက်ခေါက်များ ရေစစ်သွားပါက မိမိနှစ်သက်သလို အတုံးလေးတွေ လှီးပေးကာ အချိုမှုန့် ဆားတို့နှင့် သင့်တော်သလို နယ်ပေးပါ
  • အရည်များ ထပ်မံထွက်လာနိုင်သေးတဲ့အတွက် အရည်စစ်နိူင်မည့် ဇကာပေါ်မှာ တင်ပေးထားပါ
  • အားလုံး အဆင်သင့် ဖြစ်ပါက ဇောက်နက်ပြီး အိုးအသားထူသော အိုးတလုံးကို အပူပေးပါ
  • ထိုအိုးထဲကို ဆီထည့်ပြီး အပူပေးပါ
  • ဆီပူလာတာနဲ့ မီးကိုအနေတော် လျှော့ပေးပြီးမှ လှီးထားသော ဝက်ခေါက်ကို နည်းနည်းခြင်း ထည့်ကြော်ပေးပါ
  • ဆီထဲထည့်ပေးပြီးပါက ဝက်ခေါက်မှ ဝက်ဆီများ ပေါက်ထွက်တတ်တဲ့အတွက် အိုးအဖုံးကို ခပ်ဟဟလေး အုပ်ပေးပြီးမှ ကြော်ပေးပါ
  • နောက်တဖက် လှန်တော့မယ်ဆိုရင် မီးကိုပိတ်ပေးပြီးမှ အိုးအဖုံးကို ဖွင့်ပေးပြီး နောက်တဖက်ကို လှန်ပေးပါ
  • တဖက်ကို လှန်ပေးပြီးမှ မီးကိုပြန်ဖွင့်ပေးပြီး ဆက်ကြော်ပေးပါ
  • ဆီပေါက်ပြီး လူကိုစင်စေနိူင်တဲ့အတွက် သတိထားပြီး ကြော်ပေးပါ
  • မိမိလှီးထားသော ဝက်ခေါက်အထူအပါးအပေါ် မူတည်ပြီး ကြော်ချိန်ကို ချင့်ချိန်ပြီး ကြော်ပေးပါ
  • တခါတရံ မိမိသုံးသော မီးဖို အပူချိန် ကွာဟမှု ရှိနိူင်သောကြောင့် ကြော်ချိန်ကိုလဲ လိုတိုးပိုလျှော့ လုပ်ပေးပါ
  • ဝက်ခေါက်များ မွပြီးကြွတ်လာကာ အညိုရောင်ဘက် သန်းလာပါက ဆီစစ်ဇကာထဲသို့ ဆယ်ပြီးဆီစစ်ပေးပါ
  • ဆီစစ်ပြီး အေးသွားပါက ဝက်ခေါက်ကြော် ကြွတ်ကြွတ်မွှေးမွှေးလေးကို မိမိနှစ်သက်သလို ရှမ်းခေါက်ဆွဲ မုန့်တီနှင့် အချဉ်နှင့် တို့ပြီးစားနိူင်ပါပြီ။

Sunday, 17 September 2017

ဝက်သားပြားကြော်


ဒီတခါတော့ ဝယ်လာတဲ့ ဝက်သားတွေထဲက အသားပြားလေးတွေ ခပ်ပါးပါးလှီးပြီး တန်ပူရာမှုန့်လေးနဲ့နယ်ကာ အသားပြားကြော်လေး ကြော်စားမိပြန်ပါတယ် လွယ်ကူမြန်ဆန် ကြော်နည်းမို့လို့ မျှဝေလိုက်ပါတယ်။

ပါဝင်ပစ္စည်းများ

  • အဆီမပါသော ဝက်သား  -  250g
  • တန်ပူရာမှုန့် - ထမင်းပေါင်းအိုး ဆန်ချင်ခွက် တခွက်ခွဲ
  • ရေ - ထမင်းပေါင်းအိုး ဆန်ချင်ခွက် တ၀က်သာသာ (လိုတိုးပိုလျှော့ လုပ်ပါ)
  • ဆား - လက်ဖက်ရည်ဇွန်း တ၀က်
  • အချိုမှုန့် - လက်ဖက်ရည်ဇွန်း တ၀က် 
  • နနွင်းမှုန့် - လက်ဖက်ရည်ဇွန်း သုံးပုံတပုံ
  • ဆီ - လက်ဖက်ရည်အကြမ်းပန်းကန် ၅လုံးသာသာ
ကြော်ဖို့ပြင်ရန်
  • တန်ပူရာမှုန့် နနွင်းမှုန့် ဆား အချိုမှုန့်တို့ကိုရေနဲ့ရောပြီး သမအောင်မွှေပေးပြီး ခပ်ပျစ်ပျစ်ဖျော်ပေးပါ
  • မုန့်နှစ်ပျစ်နေစေရန် ရေကို နည်းနည်းခြင်း ထည့်ဖျော်ပေးပါ
  • ရေကို လိုတိုးပိုးလျှော့ လုပ်ပေးပါ
  • ဝက်သားကို အတုံးလိုက် ရေဆေးကာ ခပ်ပြားပြား ပါးပါးလေးတွေ ပုံပါအတိုင်း အနေတော်တုံးပေးထားပါ
  • အရသာ စပ်ထားသော မုန့်နှစ်ထဲမှာ လှီးထားသော ဝက်သားကို နှစ်ပေးပါ
  • ဆီကို မီးအပူပေးပြီး ဆီပူပြီး ကျက်လာပါက ဝက်သားမုန့်နှစ်လူးကိုတတုံးခြင်း ထဲ့ကြော်ပေးပါ
  • မီးအရမ်း မများစေရန် သတိပြုပြီး ကြော်ပေးပါ 
  • မီးအရမ်းများပါက ဝက်သားမကျက်ဘဲ ဖြစ်နေတတ်ပါတယ်
  • ဝက်သားပြားကြော် တစ်ဖက်ရွှေဝါရောင်သန်းလာပါက တဖက်ကိုလှန်ပေးပါ
  • နှစ်ဖက်လုံး ရွှေဝါရောင်သန်းလာပါက ဆယ်ပြီးဆီစစ်ပေးပါ
  • ဆီစစ်သွားပါက ဝက်သားပြားကြော် ကြွတ်ကြွတ် ရွရွလေးကို နှစ်သက်ရာ အချဉ်နဲ့တွဲဖက်ပြီး စားလို့ရပါပြီ။

Saturday, 16 September 2017

ချိုချဉ်ငံစပ် သရက်ယို


သရက်သီးခြောက်လေးတွေ လှမ်းထားတာ အခုလိုရာသီးမျိုးမှာ အရမ်းဘဲ အသုံးဝင်ပါတယ် ယိုထိုးစားမလား ဟင်းချက်စားမလား အရမ်းကို အစဉ်ပြေတဲ့ သရက်သီး ခြောက်လေးတွေပါ ဒီနေ့တော့ သရက်သီးခြောက်ကို ထန်းလျှက်ခဲနဲ့ ယိုထိုးနည်းလေး မျှဝေချင်ပါတယ်။

ပါဝင်ပစ္စည်းများ

  • သရက်သီးခြောက် - 350g
  • ထန်းလျှက်ခဲ - 200 g (အချိုကြိုက်ပါက ပိုထဲ့ပေးပါ)
  • ငရုတ်သီးအကြမ်းမှုန့် - လက်ဖက်ရည်ဇွန်းမောက်မောက် ၃ဇွန်း
  • ဆား - လက်ဖက်ရည်ဇွန်းတဝက်
  • လေးညှင်း - ၂ပွင့်
  • ဖာလာ - ၂ခု
  • စမုံစပါး - အနည်းငယ်

ပြင်ဆင်ပုံ
  1. သရက်သီးခြောက်ကို ရေနှင့်တထပ်လောက် ဆေးပေးကာ ပေါင်းဇကာထဲထည့်ပြီး ရေနွေးဆူဆူနှင့် တနာရီလောက် ပေါင်းပေးပါ
  2.  သရက်သီးခြောက်များ ပျော့လာပါက ပေါင်းအိုးကို မီးပိတ်ထားပါ 
  3. လေးညှင်း ဖာလာ စမုံစပါးတို့ကို မီးအေးအေးနှင့် မွှေးလာအောင် လှော်ထားပါ
  4. ထန်းလျှက်ခဲကို ရေမြုပ်အောင်ထည့်ပြီး ပေါက်စေးမကျတကျ ကျိုပါ
  5. ထန်းလျှက်ရည် ပေါက်စေးမကျခင် အမှိုက်များကို ဇကာနှင့်စစ်ပြီး ထန်းလျှက်ရည်ကို အိုးအသန့်တလုံးထဲ ပြန်ထည့်ပါ
  6. ထန်းလျှက်ရည်ထဲသို့ပေါင်းထားသော သရက်သီးများ ငရုတ်သီးမှုန့် ဆား လေးညှင်း ဖာလာ စမုံစပါးတို့ထည့်မွှေပေးပြီး ထန်းလျှက်ရည် ရေခမ်းအောင် မီးအေးအေးနှင့် မွှေပေးပါ
  7. ထန်းလျှက်ရည် ခမ်းလာကာ သရက်ယိုလေးလဲ မွှေးလာပြီဆိုပါက အအေးခံပြီး စားသုံးနိူင်ပါပြီ။

Friday, 15 September 2017

ငှက်​​ပျော​ပေါင်း ချိုချိုလေး





ဒီငှက်ပျောပေါင်းလေးက အုန်းသီးမှုန့် နွားနို့နဲ့ သကြားတို့ ရောပြီး ပေါင်းထားတဲ့အတွက် အရသာ တမျိုးထူးပြီး စားလို့အရမ်း ကောင်းပါတယ် မိမိနှစ်သက်ရာ ငှက်ပျောသီးကို ပေါင်းနိူင်ပြီး ပေါင်းမည့်ငှက်ပျောသီး အမျိုးအစား အချိုအရသာနှင့် အပျော့အမာပေါ် မူတည်ကာ သကြား ရေနှင့်နို့ကို ချင့်ချိန်ထည့်ပေးပြီး ပေါင်းနိူင်ပါတယ်။

မာမာကတော့ အရသာအလွန်ချိုတဲ့ သီး​မွှေးငှက်ေ​ပျာသီး အမှည့်ကို ပေါင်းတာဖြစ်တဲ့အတွက် သကြားကို လျှော့ထည့်ထားသလို ရခိုင်ငှက်ပျောသီးလို ပေါင်းချိန်မကြာဘဲ ပေါင်းချိန်မြန်ပါတယ် ရခိုင်ငှက်ပျောသီးကို ပေါင်းမယ်ဆိုရင်တော့ အသားမာပြီး အချိုပေါ့တဲ့အတွက် သကြား နွားနို့နှင့် ရေကိုပိုထည့်ပြီး ပေါင်းစေချင်ပါတယ်။

ပါဝင်ပစ္စည်းများ

  • သီး​မွှေးငှက်ပျောသီး အမှည့် - ၆လုံး 
  • သကြား - ၅ကျပ်သားခန့်
  • အုံးသီးဖတ် ခြစ်ပြီးသား - မိမိနှစ်သက်သလောက်
  • ကျိုပြီးသားနွားနို့ - ၁ လီတာ
  • ဆား - အနည်းငယ်
  • ရေ - တလီတာခန့်


  • ပြုလုပ်နည်း

    • ငှက်ပျောသီးကို အခွံခွာထားပါ
    • အုန်းသီးမှုန့်နှင့်အတူ ပါဝင်ပစ္စည်းများအားလုံးကို အဆင်သင့် ပြင်ထားပါ
    • ငှက်ပျောပေါင်း ပြုလုပ်မည့် အိုးထဲမှာနွားနို့ ရေ သကြားနှင့် ဆားအနည်းငယ်တို့ကို တည်ပါ
    • သီး​မွှေးငှက်ပျောသီးက အချိုလေးတဲ့အတွက် သကြားကို လျှော့ထည့်ထားပါတယ်
    • ရခိုင်ငှက်ပျောသီးကို ပေါင်းမယ်ဆိုရင်တော့ သကြားကို ပိုပြီးထည့်ပေးပါ
    • အရည်ကျိုနေစဉ် နွားနို့ပါတဲ့အတွက် ဝေမကျအောင် သတိထားပြီး တည်ပေးပါ
    • သကြားနှင့် ဆားတို့ အရည်ပျော်သွားပါက သကြားရည်ထဲတွင် အခွံခွာထားသော ငှက်ပျောသီးများထည့်ပြီး မီးအေးအေးဖြင့် တည်ထားပေးပါ
    • ငှက်ပျောသီးများ ပျော့လာပြီး အချိုရည်များ ၀င်သွားအောင် တည်ထားပေးပါ
    • နွားနို့မှ မလိုင်ဖတ်လေးတွေ တက်လာပြီး အရည်ပြစ်လာပါက အုန်းသီးမှုန့် ထည့်​မွှေပေးကာ မီးပိတ်ပေးပါ
    • စိမ့်ပြီးချိုနေသော ငှက်ပျောပေါင်းကို မိမိနှစ်သက်သလို စားသုံးနိူင်ပါပြီ။

    Thursday, 14 September 2017

    ဟင်းချက်အနှစ် (ဒုတိယနည်း)










    အလုပ်များတဲ့ အိမ်ရှင်မတွေအတွက် တပါတ်စာ တာရှည်ခံ ငရုတ်​သီးထောင်းလေး အဆင်သင့်ရစေဖို့ရာ အားလပ်ရက်လေးမှာ ပြင်ဆင်ထားနိူင်အောင် မာမာပြင်ဆင်ထားတဲ့ နည်းလေး မျှဝေလိုက်ပါတယ်၊၊

    အရင်တခါက ရေခဲသေတ္တာ အသုံးပြုသူတွေအတွက် ပြင်ဆင်ထားနိူင်တဲ့ နည်းဖြစ်ပြီး ဒီတခါတော့  ​ရေခဲ​သေတ္တာ အဆင်မပြေတဲ့ သူတွေအတွက် အဆင်ပြေစေတဲ့ နည်းလေးပါ။

    တပါတ်စာအတွက် မိမိချက်မည့် ဟင်းအပေါ် မူတည်ပြီး ငရုတ်သီး ကြက်သွန်ဖြူ ကြက်သွန်နီ ချင်းတို့ကို ချင့်ချိန်ပြီး ထောင်းပေး ကြိတ်ပေးနိူင်င်ပါတယ် ဟင်းအနှစ်အရသာက တယောက်နဲ့တယောက် အကြိုက်ခြင်း မတူနိူင်တဲ့အတွက်ကြောင့် မိမိနှစ်သက်ရာ အမွှေးအကြိုင်များကိုထည့်ပြီး ထောင်းနိူင် ကြိတ်နိူင်ပါတယ်။

    ပါဝင်ပစ္စည်းများနှင့်ပြင်ဆင်ပုံ

    • ငရုတ်​သီး အ​ရောင်​တင်​မှုန့် ​ထမင်းစားဇွန်း ၄ဇွန်း
    • ကြက်​သွန်​ဖြူ အမွှာကြီးကြီး အမွှာ ၂ဝခန့် ကို အခွံခွာပြီး ရေဆေးထားပါ
    • ကြက်​သွန်​နီ အလုံးကြီးကြီး ၆လုံးခန့်ကို အခွံခွာပြီး ရေဆေးထားပါ
    • ချင်း ၃လက်မခန့်ကို အခွံခွာပြီး ရေဆေးထားပါ 
    • အားလုံးအဆင်သင့် ဖြစ်တာနဲ့ ကြိတ်စက်အဆင်ပြေပါက ကြိတ်စက်နှင့် ကြိတ်ပေးပါ
    • စပါးလင် နှစ်သက်ပါက စပါးလင်ထည့်ပေးပါ
    • ဆား ထမင်းစားဇွန်း တဇွန်းခွဲ
    • ဆီ လိုသလောက် သုံးပေးပါ
    • ကြိတ်စက် အဆင်မပြေပါက ငရုတ်ဆုံနှင့် ထောင်းပေးပါ
    • ဗလင်​ဒါနှင့် ကြိတ်မည်ဆိုပါက ပစ္စည်းများအားလုံးကို ဗလင်ဒါထဲထည့်ပြီး မိမိနှစ်​သက်​တဲ့ အ​နေအထားရ​အောင်​ ကြိတ်​ပေးပါ
    • ငရုတ်ဆုံနှင့် ထောင်းလျှင်လည်း အားလုံးကိုရောကာ မိမိနှစ်သက်တဲ့ အနေအထားရအောင် ထောင်းပေးပါ
    • လိုချင်သည့် အနေအထားရပါက ငရုတ်​သီးမှုန့်နှင့်​ အ​မွှေးအကြိုင်​များထည့်​ကာ ကြိတ်​ထားသော ဟင်းအနှစ်အား ဇလုံသန့်သန့်ထဲ ထည့်ပေးကာ ဆားနှင့်ဆီထည့်ကာ သမအောင် နယ်ပေးပါ
    • အားလုံးသမသွားပြီ ဆိုတာနဲ့ ငရုတ်သီးထောင်းကို ဆီမြုပ်အောင် ဆီများများထပ်ထည့်ပေးပြီး ဇကာသန့်သန့်လေးနှင့် အုပ်ထားပေးပါ
    • ဆီမမြုပ်ပါက အပေါ်ယံတွေ မည်းလာတတ်ပြီး မှိုတက်နိူင်တဲ့အတွက် သတိထားပြီး ဆီများများ ထည့်ပေးပါ
    • ဟင်းချက်မည် ဆိုပါကလဲ ဆီစိမ်ထားသော ငရုတ်သီးပန်းကန်ကို ရေခြောက်နေသောဇွန်းဖြင့် လိုသလောက် ခပ်ယူပေးပါ
    • အရသာ ထည့်ထားသော ငရုတ်သီးများကို ဇလုံသန့်သန့်ထဲသို့ ကုန်အောင်ထည့်ပြီးတာနဲ့ ဗလင်​ဒါကို ​ရေအနည်းငယ်​နဲ့ကျင်းပြီး ဟင်းချက်​ရာတွင်​ သုံးရန်​အတွက်​ ထိုအရည်​ကိုလဲ လေလုံအိတ်ထဲထည့်ကာ ​ရေခဲ​သေတ္တာထဲမှာ ထည့်ခဲထားပါ
    • ဆီစိမ်ထားသော ငရုတ်သီးထောင်းထဲအား ရေမဝင်အောင် သတိပြုပြီး သိမ်းထားပါက တပါတ်စာအတွက် ဟင်းအနှစ်ကို  ဟင်းချက်ရန်အတွက် အဆင်သင့် သိမ်းထားနိူင်ပါပြီ
    • ငရုတ်သီးအထဲမှာ ဆားပါဝင်နေသောကြောင့် ဟင်းချက်ရာတွင် အရသာအတွက် ဆားကိုအနည်းငယ် လျှော့သုံးရန်လဲ သတိပြုပေးစေချင်ပါတယ်။