ဒီဟင်းလေး ချက်မိတိုင်း မြန်မာပြည်မှာ ဆောင်းဦး၀င်ကာစ လယ်ကွင်းမြေကြီး ကျစ်စာတွေထဲက ရတတ်တဲ့ ဒီပိုးလုံးလေးတွေကို သတိရမိပါတယ် အကောင်လေးတွေကို ဒေါက်ကွေး ဘုရင်မဆိုပြီး အမျိုးအစား ခွဲထားပြီး ဒေါက်ကွေးက အနှစ်ပိုပြီးများလို့လူကြိုက်ပိုများပါတယ် ဘုရင်မကတော့ အကောင်ဖြစ်ဖို့ အရည်ခွံပျော့ပျော့ ဖြစ်နေချိန်မို့ စားလို့ကောင်းပေမဲ့ လူကြိုက် နည်းပါတယ် ခရမ်းချဉ်သီးနဲ့မွှေကြော်လိုက်ရင် နတ်သုဒ္ဒါတစ်မျှ ကောင်းလွန်းတဲ့ အစာတစ်ခုပါဘဲ။
အခုလဲ ဒီပိုးကြော်လောက် မကောင်းပေမဲ့ အရသာ ခပ်ဆင်ဆင်လေးတူတဲ့ ခရမ်းချဉ်သီးနဲ့ကြက်ဥကို မွှေကြော် ကြော်ပြီး ထမင်းပူပူလေးနဲ့စားလိုက်ရင် အရမ်းကောင်းလွန်းလို့ ကြော်နည်းလေး မျှေ၀လိုက်ပါတယ်။
ပါ၀င်ပစ္စည်းများ
- ကြက်ဥ - ငါးလုံး
- ခရမ်းချဉ်သီး ကြီးကြီး - သုံးလုံး (သို့) ready made ဗူး - 400 g
- ကြက်သွန်နီ - အနေတော် တစ်ဥ
- ဆီ - ထမင်းစားဇွန်း လေးဇွန်း
- ဆား - လက်ဖက်ရည်ဇွန်း တစ်၀က်သာသာ
- အရသာမှုန့် - လက်ဖက်ရည်ဇွန်း တစ်၀က်သာသာ
- နနွင်းမှုန့် - လက်ဖက်ရည်ဇွန်း လေးပုံတစ်ပုံ
ပြင်ဆင်ပုံ
- ဇလုံတစ်လုံးထဲမှာ ကြက်ဥ ဆား အရသာမှုန့်တို့ထည့်ပြီး ခလောက်ထားပါ
- ခရမ်းချဉ်သီးကို ရေဆေးပြီး ခပ်ပါးပါးလေးတွေ လှီးထားပါ
- Ready made ဗူး သုံးပါက အဆင်သင့် ပြင်ထားပါ
- ကြက်သွန်နီကို အခွံခွာကာ အလုံးလိုက် ရေဆေးပြီး ခပ်ပါးပါး လှီးထားပါ
- ဒယ်အိုးကို အပူပေးပြီး ဆီနှင့် နနွင်းမှုန့် ထည့်ပါ
- ဆီအငွေ့တက်လာပါက ကြက်သွန်နီကို နွမ်းအောင်ကြော်လိုက်ပါ
- ကြက်သွန်နီ နွမ်းတာနဲ့ခရမ်းချဉ်သီးကို ထည့်မွှေကာ ကျေသွားတဲ့အထိ ကြော်ပေးပါ
- ခရမ်းချဉ်သီးများ ကျေသွားပါက ခလောက်ထားသော ကြက်ဥမွှေကို ထည့်ကြော်ပေးပါ
- ကြက်ဥနှင့်ခရမ်းချဉ်သီးများကို အဆက်မပြတ် မွှေပြီးကြော်နေရင်းမှ ခဲပြီးကျက်လာလျှင် အရသာမြည်းပြီး၍ လိုသလိုပြင်ပေးကာ သုံးဆောင်နိုင်ပါပြီ
- ချဉ်ဖြုံ့ဖြုံ့ စိမ့်စိမ့်လေးနဲ့ စားလို့အရမ်းကောင်းတဲ့ ခရမ်းချဉ်သီး ကြက်ဥမွှေကြော်ကို နှစ်သက်သလို သုံးဆောင်နိူင်ပါပြီ။
No comments:
Post a Comment