ကြံမဆိုင်ရွက်လေးတွေ အချဉ်ထည့်ထားတာ ရပြီးထဲက ဟင်းချိုရည်လေး ချက်ဖြစ်တာမို့လို့ ဒီနေ့ တော့ ကြံမဆိုင်ဟင်းချို ချက်နည်းလေး မျှဝေချင်ပါတယ် ဟင်းချိုရည်ထဲထည့်တဲ့ အသီးအရွက်တွေကတော့ မိမိနှစ်သက်တဲ့ အသီးအရွက်တွေ ထည့်နိူင်ပါတယ်။
ပါဝင်ပစ္စည်းများ
- ကြံမဆိုင် - အနေတော် သုံးပင်ခန့်
- ဝက်သား - နှစ်ဆယ်သားခန့်
- မုံလာဥနီ - အနေတော် တစ်ဥ
- ကြက်သွန်နီ - ဥအသေး လေးလုံး
- ငရုတ်သီးစိမ်း - စားနိူင်သလောက်
- ဆီ - ထမင်းစားဇွန်း နှစ်ဇွန်းခန့်
- နနွင်းမှုန့် - လက်ဖက်ရည်ဇွန်း လေးပုံတစ်ပုံ
- ဆား - လိုသလောက်
- အရသာမှုန့် - လိုသလောက်
- ကြက်သွန်ဖြူ - အမွှာကြီးကြီး သုံးမွှာ
- ကြက်သွန်နီ - အနေတော် တစ်လုံး
- ချင်း - ခပ်ပါးပါး ၃ပြား
ပြင်ဆင်ပုံ
- ကြံမဆိုင်ကို အငံပေါ့စေရန် ရေ တစ်ထပ်လောက် ဆေးပေးပါ
- ဝက်သားကို ရေဆေးပြီး လက်တစ်လုံးသာသာ အတုံးလေးတွေ တုံးထားပါ
- ကြက်သွန်နီ အလုံးသေးများကို အခွံခွါပြီး ရေဆေးထားပါ
- ကြက်သွန်နီ အနေတော်တစ်လုံးကို အခွံခွာပြီး ရေဆေးကာ ခပ်ပါးပါး လှီးထားပါ
- ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
- ချင်းကိုအခွံခွာပြီး ရေဆေးကာ ခပ်ပါးပါး အမြှောင်းလေးတွေ လှီးထားပါ
- မုံလာဥနီကို အခွံခွာကာ ရေဆေးပြီး မိမိနှစ်သက်သလို လှီးပေးထားပါ
- ငရုတ်သီးစိမ်းကို ရေဆေးထားပါ
- အားလုံးအဆင်သင့် ဖြစ်တာနဲ့ အိုးကိုအပူပေးကာ ဆီထည့်ပါ
- ဆီပူလာတာနဲ့ နနွင်းထည့်ပြီး ချင်း ကြက်သွန်ဖြူ ကြက်သွန်နီတို့ကို ထည့်ပြီးဆီသတ်ပေးပါ
- အနည်းငယ် နွမ်းရုံလေး ဆီသတ်ပြီးတာနဲ့ ဝက်သားကို ထည့်ကြော်ပါ
- ဝက်သားထဲမှ ထွက်လာသော အရည်ခမ်းလာမှ ကြက်သွန်နီ ဥအသေး မုံလာဥနီ ငရုတ်သီးစိမ်း ကြံမဆိုင် ဆား အရသာမှုန့်တို့ထည့်ကာ သမအောင် မွှေပေးပါ
- အားလုံး သမပြီဆိုတာနဲ့ ရေမြုပ်အောင်ထည့်ပြီး ကြက်သွန်ဥ နူးလာတဲ့အထိ တည်ပေးပါ
- ကြက်သွန်နီဥ နူးလာတာနဲ့ အရသာမြည်းပြီး လိုသလို ပြင်ပေးကာ ကြံမဆိုင်ဟင်းရည်ကို စားပွဲကို ပြင်နိူင်ပါပြီ။
No comments:
Post a Comment